：
『喂！記得您想做嘅事係咩呀！』
有冇人記得間舖由一開始到而家，轉過幾多次擺位？
好似整定咁，獲獲都喺趕裝修時就玩停業，好似俾多啲時間我諗裝修諗傢俬咁，今次唔同嘅係，可以俾更多時間我休息沈澱，諗清楚我想做一間咩舖，做一個咩人。
2021年最令我自己轉變嘅一個決定係唔食肉。由唔再食肉開始，我嘅消費模式變得有意識，想知道每件物品背後嘅生產過程同理念，望清世界好多只為謀利而缺乏人類責任嘅商人，我唔想成為佢哋，所以開始咗一連串製造護膚品嘅課程。
撞正停業空窗期，似乎宇宙都要提醒我：『喂！記得您想做嘅事係咩呀！』當我放低平日工作，專注搞新舖嘅日子，好似返去啱啱創業嗰段時間咁，好熱血，好衝，好自信（只能自信），嗰陣覺得，我做啲乜都係「技能get」。
當時有人話過我『您乜都唔諗，好牙煙，您估開咗舖就有人嚟？』係嘅，但如果我係一個諗好多嘅人，相信 @beautyfarmershk 直到今日都未出現到。
唔明咪問
唔識咪學
唔叻咪練
公司個Ig出啲post都唔係個個有好多反應，唔通當一個post得幾個人like就唔出？喺我眼中，嗰幾個like先令我更覺珍貴（嗰幾個人我已經記住咗😂）
冇嘢係難
難嘅係自己唔嘗試同唔堅持呀！
點解我成日出親文都多謝您哋，因為我發現搵親我嘅人都同我一樣，喺自己生命有住不同嘅堅持，唔係求奇活着，係您哋令間舖同我都有好強嘅能量，教我點攰都向前跑。
『我要令您哋每個人都擁有最健康嘅皮膚，令您哋返嚟舒服到好似返屋企咁。』
-2020年3月